嚟加入 Krita 發展基金吧！

（17/8 修訂：「軟件開發基金」改為「發展基金」。）

本月嘅焦點活動，係宣傳我哋新建立嘅 Krita 發展基金！我哋基於 Blender 嘅 development fund 程式碼，建置咗一套新嘅捐款系統。依套系統可以俾用戶自行管理各自嘅定期捐款。

到 fund.krita.org 參與依項活動並成為開發基金嘅一份子吧！

Krita：建立自社群

Krita 一直以嚟都係免費而且開放原始碼嘅軟件。有幾百人曾經為 Krita 作出貢獻，並有着共同嘅諗法，希望為世界各地過百萬用戶提供一套頂級嘅數碼繪圖軟件。Krita 基金會依頼着各方捐款，為各項相關嘅工作提供款項。喺各個應用程式商店出售 Krita 所得嘅收入亦喺度支援着 Krita，即使唔係由 Krita 基金會經手，Krita 嘅商標持有者依然係 Krita 基金會，而且 Krita 嘅長遠目標係由 Krita 嘅開發人員決定。

目的：長遠支持 Krita 開放發展

喺之前，我哋有兩個唔同嘅定期捐款渠道，一個經 PayPal，另一個經 Mollie。現時定期捐款參與人數總數有約二百人。但係，依個數量只係足以支持一位開發者同埋一位兼職嘅文件編輯者！

依個開發基金嘅目標係希望能夠支持 Krita 所有核心開發工作，令我哋可以唔使繼續依頼應用程式商店嘅收入。

• 支持開發人員編寫同維護 Krita 嘅核心程式
• 從事特殊計畫
• 支持例如 bug report 分類同修正、程式改動審查、說明文件編輯等等嘅工作

Krita 5

現時，Krita 5 嘅工作正進行得如火如荼。依個將會係一個重大嘅新版本，帶來嘅唔只有新嘅塗抹筆刷引擎、經重新編寫嘅資源管理系統、大幅擴充嘅動畫製作空間。我們計畫喺八月發佈 Krita 5。喺依次活動進行期間，我哋會定期為大家提供有關 Krita 5 嘅更新資訊。

目標

現時嘅開發基金有約二百人參與定期捐款。連同一次性捐款，我哋每月或多或少可以收到大約四千歐羅嘅捐款。

Krita 發展基金嘅目標係要確保持續性。

如我哋可以收到每月二萬五千歐羅嘅捐款，咁就足以喺唔依靠應用程式商店收入嘅情況下支持現時所有核心開發人員。