現已發佈 Krita 5.0 嘅首個測試版本 (Beta 1)
今日，Krita 開發團隊推出咗 Krita 5.0 嘅首個 beta 測試版本。Krita 5.0 係一個重大更新，包含咗大量嘅新功能同埋改動。
首先係一啲注意事項：
- Krita 5 帶有一個全新嘅資源管理系統。Krita 唔再喺啟動時重新載入全部嘅筆刷預設、圖案、漸變等等嘅資源，取而代之係喺首次啟動時載入並建立一個快取資料庫。Krita 5 喺首次啟動時會用多啲時間，但之後嘅每次啟動會比以前快。
- Krita 5 用一個不兼容 Krita 4 嘅方式嚟儲存用家修改資源嘅歷史。當你使用過 Krita 5 之後，降返去 Krita 4 嘅話有可能會喺 Krita 4 入面見到重複嘅資源。
- Krita 5 唔再支援載入由 Krita 3 或更舊版本整嘅向量圖層。
- 用 Krita 5.0 整嘅 Krita 文件 (.kra) 同 Krita 筆刷預設檔案 (.kpp) 並唔保證能夠兼容 Krita 4！
- Krita 5.0 修正咗一個同文件入面文字大細相關嘅 bug。遺憾嘅係，依項修正導致喺開啟由較舊版本整嘅文件時或者須要修改一項設定先可以令文件入面嘅文字顯示為預期正確嘅大細。
- Beta 1 已知問題：喺使用 G'Mic 濾鏡之後，Krita 嘅設定值將暫時被重設到預設值。重新開啟 Krita 後，本身嘅自訂設定將會被還原。
咁依個版本入面有啲咩新嘢呢？答案喺：好多呀！完整嘅發佈通告入面有更詳細嘅說明，而依度列出咗部份較重大嘅事項：
- 開發歷時五年嘅新資源系統
- 漸變抖色同埋寛色域漸變
- 由 LittleCMS fastfloat 外掛帶嚟效能改進
- 全新嘅 MyPaint 筆刷引擎
- 經重新編寫嘅色彩塗抹筆刷引擎
- 重新設計後嘅動畫時間軸工具面板
- 動畫用嘅再製影格
- 更新嘅動畫曲線工具面板
- 變形遮罩動畫支援
- 全新嘅分鏡圖功能
- 重新設計咗圖示同埋潤飾介面
- 加入 HEIF、AVIF、WebP 影像格式嘅支援
- 改善對 TIFF 影像格式嘅支援
- 全新嘅繪畫過程錄影工具
- 全新嘅兩點透視輔助尺，以及一個限制輔助尺運作區域嘅功能
- 變形工具依家可以顯示圖層堆疊中嘅預覽，即係變形嘅時候可以同時預覽圖層嘅混色模式、不透明度、濾鏡、遮罩等效果
- 新增貼上到使用中圖層而唔係貼上為新圖層嘅功能
- G'Mic 外掛程式濾鏡依家支援 macOS
此外仲有大量嘅小改進、小功能同埋效能改進！
**正體中文改動：**喺 Krita 5.0，翻譯者為正體中文翻譯做咗唔少改動，當中修正咗一些唔符合一般正體中文慣例嘅語句或者用詞，並為一部份功能重新改名。詳情請參見正體中文版本嘅發佈通告。
我們希望可以喺九月發佈正式版，不過唔一定保證會做到㗎！喺之前，我哋會繼續修正大家喺試用 Beta 同埋 Nightly 測試版本時所發現嘅 bug，目標喺正式發佈 Krita 5 嘅時候能夠推出一個運作穩定及暢順嘅繪畫程式。請考慮向 Krita 發展基金捐款以支持 Krita 嘅開發工作：
下載
Windows
如果你使用免安裝版：請注意，免安裝版仍然會同安裝版本共用設定檔同埋資源。如果想用免安裝版測試並回報 crash 嘅問題，請同時下載 debug symbols。
注意：我哋依家唔再提供為 32 位元 Windows 建置嘅版本。
- 64 位元安裝程式：krita-x64-5.0.0-beta1-setup.exe
- 64 位元免安裝版：krita-x64-5.0.0-beta1.zip
- Debug symbols（請解壓到 Krita 程式資料夾入面）
Linux
- 64 位元 Linux AppImage：krita-5.0.0-beta1-x86_64.appimage
Linux 版本唔使再另外下載 G'Mic-Qt 外掛程式 AppImage。
macOS
注意：如果你用緊 macOS Sierra 或者 High Sierra，請睇下依段影片了解點樣執行開發者簽署嘅程式。
- macOS 套件：krita-5.0.0-beta1.dmg
Android
我哋提供嘅 ChomeOS 同 Android 版本仲係測試版本。依個版本或可能含有大量嘅 bug，而且仲有部份功能未能正常運作。由於使用者介面仲未改進好，軟件或者須要配合實體鍵盤先可以用到全部功能。
原始碼
md5sum
下載檔案嘅 MD5 校對碼可以喺依個檔案入面搵到：
數碼簽署
Linux AppImage 以及原始碼嘅 .tar.gz 同 .tar.xz 壓縮檔已使用數碼簽署簽名。你可以由依度取得 public key。簽名檔可以喺依度搵到（副檔名為 .sig）。
支持 Krita
Krita 係免費及開放原始碼嘅項目。請考慮捐款或者購買教學影片支持我哋啦！有你嘅支持我哋先可以聘請開發人員全職進行 Krita 嘅開發工作。