Krita 5.1 發佈通告

今次係 Krita 5.0 發佈後嘅首個大型更新。Krita 5.1 包含咗好多細微嘅改進同修飾。今次升級唔單只改良咗軟件各方面嘅易用性，同時都增加咗檔案格式支援同兼容性，亦大幅度更新咗選取工具同填充工具。

我哋感謝 David Revoy 為我哋提供文中大部分功能演示短片。同時亦感謝 Wojtryb 製作新功能介紹影片：

 

圖層操作

  • Santhosh Anguluri 喺 2021 年度嘅 Google Summer of Code 專案為 Krita 實作咗同時套用於多個圖層嘅操作 (MR 888)。依項功能容許使用者喺選取多過一個圖層時做剪下、複製、貼上同清除等等嘅操作。
  • 我哋為圖層工具面板嘅介面做咗啲微調：
    • 你可以自訂圖層樹嘅縮排間距 (MR 1443)。
    • 新加咗一個按鈕，俾你喺用唔到滑鼠右鍵時都可以開啟右鍵選單 (MR 1213)。
    • 檔案圖層載入失敗時會出現警告訊息 (MR 1419)。
  • 而家你可以喺帶有混色模式嘅選取區域遮罩上繪畫 (MR 1437)。

檔案格式支援

  • WebP 支援 (MR 891, MR 1268)：過往嘅 Krita 版本淨係提供咗基本嘅 WebP 支援。最新版本加入咗完整嘅 WebP 編碼支援，俾進階嘅使用者可以調整任何編碼器選項。
  • 支援 Photoshop 多圖層 TIFF 格式 (MR 944)：雖然 TIFF 標準係由 Adobe 管理，但係 Photoshop 都係用咗一啲唔標準嘅 TIFF 編碼方式嚟保存圖層資訊，就係將成個 PSD 文件寫入做中繼資料。
    • 除此之外，我哋都更新咗 TIFF 格式匯出選項。Krita 而家都支援載入同儲存 TIFF 檔案嘅中繼資料。 (MR 1015)
  • 支援 OpenEXR 2.3 同 3 以上版本 (MR 1049)：我哋修正咗 Krita 組建系統中，一個導致用唔到 OpenEXR 2.3 或以上版本嘅問題。
  • 改善由剪貼簿擷取影像資料嘅流程 (MR 1296,  MR 1431)：當你喺唔同軟件之間複製影像時，有啲軟件會提供多種影像資料格式放入系統嘅剪貼簿。我哋改善咗俾你選取貼上影像格式嘅介面。
  • PSD 填充圖層同色彩標籤 (MR 1309)：依項改動實作咗載入同儲存 PSD 檔案入面嘅色彩標籤，同埋漸變、圖案、色彩填充圖層。由於咁樣延伸咗 Krita 入面嘅 ASL 格式支援，因為咁同時都改善咗圖層樣式嘅色彩同圖案支援。請注意，大多數 PSD 檔案將填充圖層同向量遮罩撈埋一齊用，而 Krita 尚未實作支援向量遮罩。
  • JPEG XL 支援 (MR 1363)：繼上一個版本新增咗 AVIF，依個版本加入咗 JPEG XL 影像格式支援。依個係 JPEG 影像格式系列嘅最新規格，旨在加入廣色域同埋 HDR 支援。雖然 Krita 仲未支援 HDR 格式嘅 JPEG XL 檔案，但係我哋已經實作咗載入同儲存 JPEG XL 動畫。依個亦係 Krita 入面第一個唔需要依賴 FFmpeg 就可以匯出嘅動畫格式。
  • ASE 同 ACB 調色板格式支援 (Commit 6c7ed052：ASE 係 Adboe 使用嘅調色板格式，而 ACB 係 Photoshop 用嚟表示印刷專色清單嘅格式。我哋希望喺度提醒使用者小心使用 ACB 格式，尤其係 Pantone（彩通）嘅色票數值經常更新。請同印刷廠商討應使用嘅專色。

技術層面嘅改動

部分改動只涉及軟件內部嘅技術層面。

  • 修正 OpenGL ES 嘅 OCIO 流程 (MR 1262)：咁表示 OCIO 而家可以喺 Android 平台上面使用。我哋亦更新到使用 VFX 平台 CY2021 (Commit 3d24ed13)。
  • 喺 Windows 上使用更新嘅 ANGLE 版本 (MR 1373, MR 1353)：Krita 喺以前用緊嘅 ANGLE 係舊版本，而更新版本帶嚟咗好多修正。一路以嚟，ANGLE 程式庫俾到 Krita 可以喺 Windows 上面穩定咁使用 OpenGL 圖形加速。
  • 新增 YCbCr 色彩特性檔案 (MR 1330)：以前 Krita 冇內置 YCbCr 嘅色彩設定檔，咁係因為過往並唔存在開放援權嘅 YCbCr 色彩設定檔。於是，Krita 嘅開發者建立咗一系列 YCbCr 色彩設定檔，並將佢哋加入 Krita。
  • 支援喺 Windows 上面使用 llvm-mingw 組建工具組 (MR 1372)。
  • 支援為 RISC-V 平台建置 (MR 1416)。由於 Krita 嘅開發者佢哋冇 RISC-V 硬件做測試用途，依項只係俾愛好者嘗試使用。
  • 由 VC 移植到 XSIMD 程式庫 (MR 1404)。Krita 用依啲程式庫嚟實作「向量指令集」加速。依種指令集令處理器能夠同時做多項重覆嘅數學運算，對色彩混合操作十分有效。由於 VC 程式庫嘅開發步伐停滯，因為咁移植到 XSIMD 程式庫有助防此程式碼變得過時。使用 XSIMD 亦帶嚟咗其他好處。喺切換程式俥嘅同時，改善咗上色同亮度筆刷嘅效能。同時，XSIMD 對 ARM 處理器嘅支援就表示 Krita 而家可以喺 ARM 平台上面使用向量指令集加速，令 Krita 喺多數 Android 平板電腦同埋 Apple M1、M2 平台上嘅效能獲得顯著提升。
  • 新增使用預編譯標頭檔嘅選項 (MR 1471)。開發者可以啟用依個選項以縮短編譯時間。
  • 提供關於 Windows 上 AppData 目錄路徑嘅進一步資訊 (MR 1304)。喺使用 Microsoft 商店版本嘅 Krita 嗰陣，AppData 目錄同一般安裝版本有分別。我哋希望可以更清晰咁話畀使用者知。

易用性改良

  • 量化選色器新增咗色彩預覽同埋 HSV 模式（只適用於 RGB 色彩空間）(MR 916, MR 1434)。
  • 觸控手勢（使用多指拖曳嚟做平移、縮放、旋轉）而家可以自訂 (MR 1341)。
  • 喺縮放列隔籬有一個切換選項，以前曾經用「使用相對於螢幕像素的縮放比例」或者「使用與像素相同的寬高比」（英文：「Use same aspect as pixels」）嚟做工具提示。依個選項實際上係將畫布縮放比例喺「符合螢幕像素大小」同「符合列印本實物大小」之間切換。前者比較適用喺數碼畫作，例如喺遊戲入面用嘅圖像或者像素圖。而後者比較適用喺印刷作品，因為喺螢幕上顯示嘅畫布尺寸同列印本實物嘅尺寸會一樣。我哋改善咗依個選項嘅顯示方式，以更清楚咁表達佢嘅功能 (MR 1220)。
  • 提供更多浮動畫具板嘅選項 (MR 922)。
  • 新增指派前景色同背景色選取操作嘅快捷鍵 (MR 1100)。
  • 補完指派濾鏡操作嘅快捷鍵 (MR 1109)。
  • 新增平滑縮放切換選項，取代固定縮放級別順序 (MR 1138)。
  • 改進最近使用檔案選單 (MR 1258, MR 1283, MR 1295, MR 1297, MR 1307)。
  • 改善右至左介面方向顯示 (MR 1267)。
  • 改善個別對話框 (MR 1317, MR 1328, MR 1331)。
  • 喺 HSV 調整濾鏡選項加入彩色滑動條 (MR 1438)。
  • 只有喺撳住 Alt 鍵嗰陣時將變形工具嘅錨點局限喺變形邊框入面 (MR 1440)。
  • 喺「數位混色器」加入重設按鈕同狀態保存 (MR 1361)。
  • 新增喺縮放至符合影像大小時加入邊界間距嘅選項 (MR 1344)。

填充同選取工具

Deif Lou 喺過去嘅六個月花咗好多功夫大幅改進咗填充同埋連續選取工具。

依啲工具嘅選項喺重新編排過後比以前組織得更好 (MR 1360, MR 1453)。之所以有重新編排嘅必要，係因為喺改進依啲工具嘅時候，同時都新增咗柔和度選項 (MR 1174) 以及基於 FXAA 演算法嘅邊緣反鋸齒過濾 (MR 1350)。

現時 Krita 有三種方式進行色彩填充。第一種係連續填充 (MR 1160)：你可以喺畫布上拖曳游標，為游標經過嘅區域填色。

第二種係新加入嘅閉合區域填充工具 (MR 1415)：你可以喺想要填色嘅範圍畫出方框或者任意形狀，Krita 就會自動判斷應該填色嘅範圍。

最後一種係經過改進嘅調色板拖放填充功能 (MR 1135)：當你由調色板拖放色塊到畫布上面，Krita 就會根據而家用緊嘅填充工具選項嚟填色。

筆刷調整

  • 新增設定最高筆刷速度值嘅選項 (MR 996)。
  • 新增指派設定流量、淡化、分散選項操作嘅快捷鍵 (MR 1037)。
  • 允許喺使用橡皮擦筆刷時停用輔助尺吸附功能 (MR 1199)。
  • 加入更多噴霧筆刷嘅顆粒分佈選項 (MR 1377)。
  • 允許喺使用筆刷銳利度選項嗰陣停用筆刷輸廓預覧對齊到像素格線嘅效果 (MR 1405)。你可以依照自己喺製作像素畫嗰陣時嘅習慣嚟決定要唔要啟用依個選項。
  • 允許為橡皮擦筆刷分別設定游標同埋筆刷輸廓選項 (MR 1426)。
  • 新增切換筆刷輸廓操作嘅快捷鍵 (MR 1430)。
  • 為草圖筆刷引擎加入邊緣反鋸齒選項 (MR 1425)。

其他更新

  • 為錄影工具匯出影片加入保持顯示最後一個影格嘅選項 (MR 1087)。
  • 為錄影工具匯出影片加入喺開頭加插預覧嘅選項 (MR 1293)。
  • 新增透視橢圓輔助尺 (MR 1343)。依個係 Srirupa Datta 喺 2022 年 KDE Season of Code 完成嘅專案。依個透視橢圓輔助尺可以幫你喺立體空間繪畫符合透視投影嘅圓形。
  • 為直線輔助尺加上刻度細分顯示 (MR 1298)。
  • 改善網點產生器 (MR 1010)。而家產生嘅網點可以調校到更加有一致性。
  • G’Mic 問題修正 (MR 1464)。
  • 加入喺儲存操作失敗時顯示警告 (MR 1410)。
  • 色階濾鏡可以分開色彩通道分別套用 (MR 1067)。