發佈 Krita 5.1.0 首個測試版本 (Beta 1)

發佈時間：   2022 年 06 月 23 日

今日我哋發佈咗 Krita 5.1.0 嘅第一個測試版本。Krita 5.1.0 帶嚟咗好多新功能呀！想知道完整嘅新功能清單嘅話，可以睇下仲未寫完嘅英文版發佈通告喎！


Krita 係自由、免費同開源嘅專案。請考慮加入 Krita 發展基金、損款，或者購買教學影片支持我哋啦！有你哋嘅熱心支持，我哋先可以俾核心開發者全職為 Krita 工作。

重點新功能

  • 更多操作可以支援同時處理多過一個已選取圖層。
  • 我哋改善咗對 WebP 檔案、帶有 Photoshop 圖層嘅 TIFF 檔案，以及 Photoshop 檔案嘅支援。同時，我哋亦都新增咗支援 JPEG XL 檔案格式。（但係請留意下面嘅已知問題。）
  • Krita 依家用咗 XSIMD 程式庫嚟取代 Vc 做 SIMD（單指令多資料流）加速，以進一步提升筆刷效能。依樣嘢對於喺 Android 裝置上運行嘅效能影響尤其大，因為依個係首個支援 ARM 架構嘅 SIMD 加速指令集嘅 Krita 版本。
  • 填充工具已擴展到去支援「多重填充」（連續模式），另外亦都新加咗一個「閉合區域填充工具」。
  • 我哋為 Windows 版本更新咗 ANGLE 程式庫，以改善圖形加速嘅兼容性同埋效能。
  • 你依家可以喺「畫布輸入設定」入面設定觸控手勢 (touchscreen) 操作，例如用兩指點選嚟復原。

當然，仲有大量各項修正、效能提升、介面改進，連帶動畫功能都有啲改善。（不過動畫音效系統嘅大修趕唔切喺依個版本推出，要留俾 5.2 版本喇。）

已知問題

  • 依個版本可以自訂觸控手勢輸入，不過如果你喺舊版有用到觸控輸入嘅話，你需要喺「畫布輸入設定」入面重新加入同設定觸控手勢，咁先至可以繼續用觸控輸入。
  • 雖然依個版本已經加入咗 JPEG XL 動畫嘅支援，但係喺匯入同埋匯出 JPEG XL 動畫時已知道會產生唔啱嘅輸出。我哋已經喺度修正緊依個問題。

5.1.0-beta1 介面截圖

下載

Windows

如果你使用免安裝版：請注意，免安裝版仍然會同安裝版本共用設定檔同埋資源。如果想用免安裝版測試並回報 crash 嘅問題，請同時下載偵錯符號 (debug symbols)。

注意：我哋依家唔再提供為 32 位元 Windows 建置嘅版本。

Linux

Linux 版本依家唔使再另外下載 G’Mic-Qt 外掛程式 AppImage。

macOS

注意：如果你用緊 macOS Sierra 或者 High Sierra，請睇下依段影片了解點樣執行開發者簽署嘅程式。

Android

我哋提供嘅 ChomeOS 同 Android 版本仲係測試版本。依個版本或可能含有大量嘅 bug，而且仲有部份功能未能正常運作。由於使用者介面仲未改進好，軟件或者須要配合實體鍵盤先可以用到全部功能。Krita 唔啱俾 Android 智能電話用，只係啱平板電腦用，因為使用者介面嘅設計並未為細小嘅螢幕做最佳化。

原始碼

訂閱 Krita 通知電郵（英文）

第一時間收到 Krita 更新版本嘅資訊。你提供嘅電郵地址只會用作傳送新版 Krita 嘅發佈通知，並唔會作其他用途。