Krita 軟件授權

（請注意：本頁內容並唔係法律文件，只供參考。）

Krita 係以 GNU General Public License (GPL) version 3 授權條款發佈嘅軟件。依個授權賦予你依幾項權利：

• 你可以為任何目的自由使用 Krita，包括用佢嚟製作商業作品、將佢安裝喺學校或公司電腦等等。
• 你可以自由提供 Krita 俾其他人使用。不過由於 Krita 嘅商標係由 Krita 基金會持有，因止你唔可以直接以商業性質轉售 Krita。如果你希望轉售 Krita 軟件，你必須將軟件改名以及更換軟件圖示，並自行重新編譯。提供非商業性質嘅免費下載則不在止限。
• 你可以取得 Krita 嘅原始碼並作出修改。如果你發佈任何經過修改嘅衍生軟件，你必須同時以 GPL version 3 授權提供你所做嘅所有原始碼改動。

授權詳細資料

Krita 整體係以 GPL version 3 發佈。內裏某啲部份本身係使用其他較為寬鬆嘅授權條款，佢哋會喺相關嘅原始碼清楚標示。我哋官方提供嘅 Krita 發佈版本亦包含第三方以 GPL 或更寬鬆嘅授權條款發佈嘅程式庫。Krita 嘅原始碼有清楚列出依啲第三方程式庫嘅下載位置，並包括含我哋作出嘅改動。

分享或出售外掛程式（包括　Python 程式指令集）

你可以用 C++ 或者 Python 為 Krita 製作外掛程式。Krita 嘅外掛應用程式介面係 Krita 嘅一個核心部分，係根據 GPL version 3 授權。咁表示當你發佈自己嘅 Krita 外掛程式，佢哋都一樣要使用 GPL version 3 授權。你可以出售 Krita 外掛程式，不過根據 GPL 授權條款賦予嘅權利，你唔可以妨礙任何持有該外掛程式嘅人將其重新發佈。

你製作嘅作品

你使用 Krita 製作嘅所有作品都係你嘅個人財產，版權歸你所有，並無使用限制。依個係 Krita 使用嘅 GPL 授㩲條款帶俾用家嘅權利。

個人私隱及網路存取

Krita 尊重你嘅個人私隱。安裝同使用 Krita 唔需要登記，亦唔需要網路連線（除咗可能需要喺網上下載程式檔案）。Krita 可以完全 offline 使用，唯一需要連上網嘅功能只有喺「開始畫面」中嘅「新聞」功能，而依個功能預設係關閉咗。當你啟用咗檢查更新嘅時候，Krita 先會連上網下載最新消息。我哋亦唔會透過依個功能作出任何個人追踪。

如果你喺 Microsoft Store 或者 Steam 商店購買並安裝 Krita，佢哋會連上網檢查更新版本。

你用緊嘅作業系統可能會追踪 Krita 嘅使用情況。Windows 會記錄所有你開過嘅程式並傳送相關嘅資料俾 Microsoft。雖然我哋可以存取相關嘅統計數據，但係依啲數據並唔能夠用作個人追踪。

Microsoft Store 同 Steam 商店上嘅 Krita

喺 Microsoft Store 同 Steam 商店出售嘅 Krita 同樣係以 GPL version 3 授權發佈。依兩個版本嘅收費係用嚟支援 Krita 嘅開發工作。